Jubilee yadai Raila analenga kugonganisha Wakenya kwa msingi wa ardhi

Suala la ardhi ni mojawapo ya ajenda za kampeini zinazoibua hisia kali na za kihistoria. Na siku 52 kabla ya kipenga cha mchuano wa mwezi Agosti kupulizwa, suala la umiliki wa ardhi limeibuka huku matamshi ya kinara wa NASA Raila Odinga hapo jana katika kaunti ya Kajiado yakiibua mihemko. Viongozi wa Jubilee sasa wanaitaka tume ya maridhiano na utangamano (NCIC) kumchukulia Odinga hatua za kisheria kwa madai ya uchochezi. Hata hivyo, Odinga amekanusha madai hayo, na kudai rais na kikosi chake wanakwepa masuala mazito ya utendakazi wao.